የፀሐይ ኢንዱስትሪ አ.ማ. 6ኛ መደበኛ እና 3ኛ ድንገተኛ ጠቅላላ ጉባኤ ተካሄደ

የፀሐይ ኢንዱስትሪ አ.ማ. 6ኛ መደበኛ እና 3ኛ ድንገተኛ ጠቅላላ ጉባኤ ታህሳስ 30 ቀን 2010 ዓ.ም በቃሊቲ ብረታ ብረት ፋብሪካ ቅፅረ ግቢ በሚገኘው የመሰብሰቢያ አዳራሽ ተካሂዷል፡፡

በጉባኤው ላይ የዳይሬክተሮች ቦርድ ሰብሳቢ አቶ ተስፋዬ ፈንቴ ጥሪውን አክብረው በጉባኤው ላይ የተገኙትን ባለአክሲዮኖች በማመስገን ንግግራቸውን የጀመሩ ሲሆን በንግግራቸውም፡-

  • ባለፉት ሁለት ዓመታት ሲደርግ እንደነበረው ሁሉ ለ2009 በጀት ዓመት በዕቅድ የተያዙ ልዩ ልዩ ተግባራት በአግባቡ እንዲከናወኑ ለአክሲዮን ማኅበሩ ማኔጅመንት ተገቢውን አመራር በመስጠት፣ በመከታተልና ተገቢውን ድጋፍ በማድረግ ካለፉት ዓመታት ሁሉ የተሻለ እና አበረታች የሚባል የሥራ አፈፃፀም እንዲመዘገብ መደረጉን፣
  • በዚህ በጀት ዓመት በምርትና ሽያጭ ከታቀደው ዕቅድ አንፃር የፋብሪካው አፈፃፀም አነስተኛ ቢሆንም ካለፉት በጀት ዓመታት ጋር ሲነፃፀር ግን የተሻለ እንደነበር አሃዞች ማመልከታቸውን፣
  • በትርፍ በኩልም በ2008 በጀት ዓመት ከነበረው የትርፍ መጠን እጅግ በተሻለ ሁኔታ ማደጉን፣
  • የፋብሪካው የ2009 በጀት ዓመት አፈፃፀም ከ2008 በጀት ዓመት ጋር ሲነፃፀር በሁሉም ረገድ የታቀደውን ያህል ባይሆንም የተሻለ እንደነበርና በበጀት ዓመቱ መጨረሻም የአክሲዮን ማህበሩ ጠቅላላ ሀብት ወደ ብር 959.24 ሚሊዮን በማደግ የ 8.6% ጭማሪ ማሳየቱን፣
  • በተዘጋጀው የስትራቴጂክ ሳይት ፕላን መሠረት ለተሳቢና የጭነት አካላት ማምረቻ የሚሆኑ ሁለት ትልልቅ የወርክሾፕ ህንፃዎች ተገንብተው በሥራ ላይ እንዲውሉ መደረጉን፣
  • የሽያጭ አውታር ከማስፋት አንፃር በደብረብርሃን ከተማ ቅርንጫፍ የሽያጭ ማዕከል መከፈቱን፣
  • በቀጣይ ለመሥራት ለታቀዱት ሦስት ፕሮጀክቶች ይሆን ዘንድ በደብረብርሃን ከተማ 82,660 ካሬ ሜትር ቦታ ለመረከብ መቻሉን ሆኖም ቦታዎቹ ኩታ ገጠም ለማስደረግ በክትትል ላይ መሆኑን፣
  • በገበያ ተፈላጊ የሆኑትን ምርቶች በማምረት የድርጅቱን ሽያጭና ትርፍ ለማሳደግ እንዲቻል አንድ ትልቅ አቅም ያለው የብረት ቱቦ ማምረቻ፣ ባለጌጥና የጣሪያ ቆርቆሮ ማምረቻ እና ሌሎች ልዩ ልዩ የማምረቻ መሣሪያዎች ተገዝተው እንዲተከሉና ከፊሎቹ የማምረት ሥራ እንዲጀምሩ የተደረገ ሲሆን ከፊሎቹ ደግሞ በተከላ ሂደት ላይ መሆናቸውን፣
  • የድርጅቱ ትልቁና ዋናው ሀብት የሰው ሀይል በመሆኑ የሠራተኛ አስተዳደርን፣ ቅጥርን፣ ዕድገትን እና የዝውውርን አሠራር በማሻሻል አሠራሩን ለማዘመን ጥረት የተደረገ ሲሆን የተለያዩ አስተሳሰቦች እንዲስተናገዱ መደረጉ ለሥራው መሻሻል አስተዋፅዖ ማድረጉን፣
  • ገልፀዋል፡፡
    በዕለቱ፡

    • የዳይሬክተሮች ቦርድ ሪፖርት እና ጌታቸው ዋቅጅራና ጓደኞቹ የተመሰከረላቸው የሂሳብ አዋቂዎችና የተፈቀደለት ኦዲተር አማካይነት የውጭ ኦዲት ሪፖርት ለተሰብሳቢዎች ቀርቦ ውይይት ከተደረገባቸው በኋላ ፀድቀዋል፣
    • በ3ኛው ድንገተኛ ጉባዔ ላይ የአክሲዮን ማህበሩን ካፒታል በዕጥፍ ለማሳደግ ተወስኗል፣
    • የዳይሬክተሮች ቦርድ አባላት ምርጫም የተካሄደ ሲሆን የቦርድ አባላቱ ብዛት ከ ሰባት ወደ ዘጠኝ ከፍ እንዲል በተወሰነው መሠረት የቦርድ አባላት ምርጫ ተካሂዶ ጉባዔው ተጠናቋል፡፡